PPA ta mas bibo cu nunca

Nos ta atrobe na porta di eleccion y PPA ta mas bibo cu nunca y cu un Lider nobo cu Pueblo a Pidi! PPA a level up y kier pa Pueblo di Aruba tambe bay pa e Proximo Nivel!

PPA t’ey un bes mas pa salba pueblo di Aruba di un massacre financiero/economico cu nos actual gobernantenan a hinca nos aden. Nos ta na un momento historico atrobe, caminda Aruba ta den un crisis financiero grandisimo y cual nos gobernantenan ta contento cu loque nan a hasi y no ta wak e problema. 

Dicon mi ta bisa cu PPA t’ey un bes mas pa salba pueblo?

PPA a wordo funda na aña 1949 door di un diferencia di opinion encuanto acceptacion di un arreglo cu tabata regarda nos                    autonomia, mirando cu AVP, lidera pa sr. Henny Eman q.e.p.d., kier a bende Aruba cu Hulanda, kitando tur nos derechonan. PPA a logra evita esaki y salba nos di perde nos autonomia. Esaki a conduci cu na aña 1955, PPA a logra gana eleccion cu 15 asiento!

  

 

Juan Enrique Irausquin.

Historia a demostra, cu cada bes cu AVP ta den gobierno, nan ta pone Aruba den problema y pone pueblo di Aruba su cara na berguensa. Historia ta bolbe ripiti y ta papia pa su mes

. Si bo no sa historia, bo no sa di unda bo ta bin, ni unda bo ta bay!

.

Na e momentonan aki, atrobe, pueblo di Aruba su cara ta na berguensa, mirando e corupcion na gran escala cu a wordo constata, nos pueblo humilde no a bay dilanti, mas bien ta pasando trabao pa por jega fin di luna, mirando cu costo di bida ta caro pa e.o. motibo cu no tin control di preis.

PPA su mision ta husticia social y trato igual pa un y tur. PPA su team ta consisti di hendenan integro y honesto cu nan unico meta ta pa traha pa hiba Aruba su cuidadanonan den e rumbo di progreso, caminda ordo y respet lo bolbe reina, tur hende por sinti alivio den nan cartera, ampliacion di canasta basico, crea cuponan di trabao di balor, crea otro pilarnan economico pa Aruba y sanea e situacion financiero precario cu na e momentonan aki nos ta aden.

PPA semper ta dispuesto pa salbaguardia y salba Aruba. Digno pueblo di Aruba, PPA nunca a faya bo, ni laga bo na caya, PPA nunca lo laga su pueblo stima cay! 

Kico PPA a hasi pa Aruba?

Algun projecto, cu durante añanan den cual PPA tabata forma parti di gobernacion, a wordo ehecuta:

-             Desaroyo sindical

-          Rebaho di prijs di awa y corriente

-          Inicio era di turismo; Aruba Caribbean Hotel

-          Pensioen pa nos grandinan

-          Scol liber pa tur mucha, incluyendo beca

-          Renobacion y construccion di scolnan

-          (Hulp)bestuurskantoor na San Nicolas

-          Construccion di haf na Barcadera

-            Construccion di brug di Spaans Lagoen

-          Hotelvakschool cual recientemente a cuminsa wordo desmantela door do gobierno actual

-          Cas pa pueblo

-          Aeropuerto y hospital moderno

-          Construccion di un bibliotheca nobo

-          Construccion di Edificio di Douane

-          Air Aruba

-          Setar

-          y asina mi por sigui menshona hopi mas.

  Historia ta papia pa su mes. 

Si bo no sa historia, bo no sa di unda bo ta bin, ni unda bo ta bay!

Digno Pueblo Arubano, bo sa di unda nos a bin y unda, hunto cu bo, nos por bay. Ban hiba Aruba pa e proximo nivel! Ban pone Aruba BEK prome, paso Aruba Sepmer Mester ta Prome!

Digno pueblo, mi ta hasi un yamado na bo persona, vota consciente y ban destaca Aruba bek, pero cu cosnan positivo!

 

 

Lider di PPA

Kar-Lie M.A. Ng

Lista 2, number 2, color Khaki.