Despues di hopi aña partido PPA ta conoce lider nobo

Mi Nomber ta Kar-Lie Ng y Mi ta e lider nobo di PPA

Lider di PPA Kar-Lie Ng,  No.2 riba e lista combina:    

Diabierna, di 4 di augustus 2017 tabata un fecha historico pa nos pais Aruba y pa mi persona, dentro di nos democracia hoben, ora cu partidonan politico a bai entrega nan lista na ‘Electorale Raad’  pa asina cumpli cu e prome deber como organisacion politico pa por participa na e eleccion di dia 22 di September 2017

Pa mi tabata un honor y placer di por a asisti na e evento aki  den mi recien calidad como Lider di partido PPA, occupando posicion number DOS ( 2 ) riba e lista combina di PPA/UPP.  Un pabien na TUR organisacion politico cu a cumpli cu esaki y exito durante e eleccion venidero. 

Di mi parti mi intencion ta pa core un campanja fuerte y responsabel. Como organisacion politico PPA y sigur nos combinacion esta ‘PPA/UPP’ tin tur intencion pa jega na mas hopi ciudadano posibel, sea personalmente, sea pa medio di medionan di comunicacion y  medionan social pa asina duna nos mensahe … Kiko ta nos prioridad ??  Con nos lo kier logranan ??

 
Algun informacion di mi persona ta:

Mi nomber completo ta  sra. Ng, Kar-Lie Marielourde A., mihor conoci como Kar-Lie. Prome mi a participa activamente den politica mi tabata parti di bestuur di Parlamento Hubenil (2003-2004). Mi a jega di participa den politica caba riba Lista di PPA y riba Lista di Democracia Real. Durante ambos periodo mi a sinja masha hopi mes. Ultimo anja mi tin hopi contacto cu x Lider di PPA sr. Benny Nisbet y nos a papia profundamente riba e topico di politica y e problematica cu pais Aruba ta confronta. Mi tin un HBO opleiding riba tereno di Finanzas y Economia (Bedrijfseconomie) y mi ta sigiendo un estudio riba nivel di Masters den Internationaal Belastingrecht.  Tambe por agrega, cu mi persona ta forma parti di staf di Departamento di Aduana. Mi ta descendiente  di  parti di mi tata di famia Ng, conoci pa algun generacion na San Nicolas (Abuelo, sr. Fook Ng q.e.p.d. y abuela sra. Imelda “Memechi” Young q.e.p.d., mientras di parti di mi mama mi ta descendiente di famia Angela, mi abuelo ta sr. Francisco “Chico” Angela  q.e.p.d. cu tabata biba banda di Stadion y masagista bon conoci y mi abuela sra. Marina Morel q.e.p.d. 

Despues cu sr. Benny Nisbet, x Lider di PPA a sorprendemi  cu e peticion  pa como un persona hoben (Millennial) mi accepta e reto di Lidera lista/partido PPA, mi a pensele profundamente y despues di  a reuni  algun hora cu sr. Benny Nisbet mi a dicidi di accepta e reto  cu ta ensera  pa contribui  na guia PPA y participa  na e proceso Democratico pa salba nos pais stima Aruba.  ….I pa hibe pa e Proximo Nivel y un miho majan.

Nos prioridadnan como partido y como combinacion di Lista ta e.o. pa soluciona e crisis financiero, economico y social di nos Pais: 

• Maneho financiero (Meta di PPA-UPP lo ta pa baha e gastonan di gobierno, iniciando cu conseho di Minister mes, bahando e cantidad di Minister pa 7 y mara e staf na un plafond di max. 12 persona. Analisando y bahando e gastonan en general di gobierno.)
• Siguridad (nos ta referi e.o. na nos Masterplan pa eleva siguridad na Aruba)
• Good Governance (implementacion di mas transparencia y control)
• Ensenjansa (Prioridad number 1. PPA lo inicia un maneho pa hasi ensenjansa liber/gratis gradualmente 2. PPA-UPP su maneho lo encera mas inversion den e alumno/studiante, mas inversion den e maestro y mas inversion den e maneho di ensenjansa) 

Ja caba tin algun diferencia cardinal entre e combinacion PPA/UPP y varios partido politico cu ta pone bandera, sticker, musica y festival na prome lugar, mientras nos pais Aruba ta den un crisis financiero/economico/social immensamente serio ta domina nos pais. Nos combinacion tin intencion pa dedica atencion na ‘informa’ nos pueblo di nos vision/programa pa pueblo por huzga nos seriedad dentro di e panorama politico actual. ‘Aruba…..pa e Proximo Nivel y un miho majan’ ta e mensahe cu ta diferencia y distingui su mes durante e prome salida official.

Finalmente pa nos logra e metanan aki nos mester di sosten di pueblo. Pa e motibo aki den mi calidad di e funcion di Lider di partido PPA mi ta hasi un apelacion serio y sincero na henter nos pueblo pa pueblo duna nos e sosten cu nos mester pa dia 22 di Sep nos partido por ta un di esnan cu lo por representa e digno pueblo di Aruba den parlamento di ARUBA