Den Ocho Aña nada no a Cambia

Nos a wak cu den Ocho aña nada no a Cambia

Enfoque di e articulo aki ta un mihor calidad di bida.

Den e edicion aki mi lo enfoca ariba e costo di bida

Cu dolor na mi curazon mi ta wak mayornan y muchanan pasando trabao tur dia. Muchanan ta bai skol sin cuminda, no pasobra mayornan ta irresponsabel, sino pasobra e situacion actual tin hopi hende pasando trabao pa por pone cuminda riba mesa.

Muchanan ta keda sin bay skol, pasobra nan tin cu traha pa por yuda mayornan cu gastonan y asina aki gobiernonan cu a sinta durante e ultimo ananan tabata di acuerdo cu esaki pasobra nan no a hasi nada pa drecha e situacion.

Ora eleccion ta den porta bo ta wak gobierno ta hasi algo den pura pa gana e pueblo cu realmente nan ta preocupa pa nos hendenan! Loque nan ta hasi, ta campana cu placa di pueblo!

E ora ey e pregunta ta lanta: "Kiko nos por hasi pa drecha e situacion?"

Pa cuminsa lo mester drecha diferente ley cu nos tin cu ta anticua. Un di nan ta e minimum loon. Otro cos cu por hasi ta crea un fondo/subsidia door di e instancianan actual of cu acuerdonan cu distribuidornan (cu incentiva den nan winstbelasting) pa aporta cu cuminda saludabel na nos skolnan, pa asina tur mucha por haña desayuno na skol gratuitamente y e peso no ta cay pa gobierno so of pa e fundacionnan cu ta otorga subsidio. Asina aki e muchanan lo tin mas interes pa bay skol, pasobra cu nan sa cu akinan nan ta haña algo di come y nan por siña y concentra mihor compara cu si nan mester pasa henter dia cu hamber. Ademas di cu e ora ey mayornan no tin mester di laga nan jiunan sin bay skol pasobra nan no tin manera pa duna nan desayuno of placa pa come. Ademas cu e ora ey tambe nos ta aportando pa tin menos "drop-outs" y mayornan por bay traha mas trankil, pasobra nan sa cu nan jiu tin cuminda.

Ademas lo mester bin adaptacion of cambio di algun ley cu tin di haber cu:

• Baha invoerrechten riba cierto productonan;
• Baha cierto belastingnan responsablemente;
• Drecha e ley di minimum loon;
• Bini cu arreglonan pagabel pa huur/hypotheek di cas door di F.C.C.A.;
• Traha leynan pa hasi naschoolse opvang y creche pagabel y cu hendenan capacita pa guia y  cuida
bo jiunan den bo ausencia;
• Amplia e canasta basico y controla e prijsnan di e productonan aki tambe;
• Baha e porcentahe di brandstofclausule, of kita esaki (dus prijs di awa y coriente);
• Stimula fiscalmente e beneficionan secundario pa sector priva y mehoracion di e beneficionan aki;
• Amplia aftrekposten di belasting riba entrada (Inkomstenbelasting).

Hasi boso mes e siguiente preguntanan:

• Cua tabata e ultimo biaha cu hendenan cu ta gana minimum loon tabata por a biba honestamente?
• Dicon nos no por haña e placa cu gobierno debe nos na belasting na tempo?
• Dicon nos no por haña e placa cu gobierno debe nos na belasting bek cu interes riba dje?
• Con nos por drecha e situacion actual?

Pueblo, cu boso mandato dia 22 di September proximo, nos lo por hasi un cambio pa mihor!
Ban trece un cambio pa nos logra rescata nos famianan cu ta pasando trabao actualmente.
Nos ta confia riba boso sano huicio pa nos por alivia nos famianan y muchanan cu ta pasando trabao diariamente, pa nan por tin un mihor calidad di bida y un mihor futuro.